Language: EN MM

၁၉ ဇူလိုင်

၁၉၄၇

ယခုအချိန် တစ်မျိုးသားလုံး သူ့ကျွန်ဘဝမှ လွတ်မြောက်လာခဲ့ခြင်းသည် လွယ်ကူစွာဖြင့် ရရှိလာခဲ့ခြင်းတော့ မဟုတ်ခဲ့ပေ။ လွမ်းမွေ့ဆွတ်ပျံဖွယ် ကြေကွဲစရာကောင်းလှသော ၁၉၄၇ ခုနှစ် ဇူလိုင်လ ၁၉ ရက် နံနက်ခင်းအခါဝယ် တစ်မျိုးသားလုံး၏ခေါင်းဆောင်ကြီး ဗိုလ်ချုပ်အောင်ဆန်းနှင့်တကွ အခြားသောအာဇာနည်ခေါင်းဆောင်ကြီးများ နိုင်ငံတော်၏ ရှေ့ရေးကိုတိုင်ပင်ဆွေးနွေးနေခိုက် မသမာသူတို့၏ လုပ်ကြံမှုဖြင့် ကွယ်လွန်ခဲ့ရရှာသည်။ ထိုအခင်းဖြစ်ပွားမှုတွင် ဗိုလ်ချုပ်အောင်ဆန်းနှင့် တကွ မိုင်းပွန်စော်ဘွားကြီး စဝ်စံထွန်း၊ ဦးရာဇတ်၊ သခင်မြ၊ ဦးအုန်းမောင်၊ ဦးဘချို၊ မန်းဘခိုင်၊ ဦးဘဝင်းနှင့် ရဲဘော်ကိုထွေးတို့ ကျဆုံးမှုတွင် ပါဝင်ခဲ့ကြရသည်။ လုပ်ကြံမှုတွင် ပါဝင်သော အဓိကကြိုးကိုင်သူဖြစ်သည့် ဂဋ္ဌုန်ဦးစောအား အင်းစိန် အကျဉ်းထောင်ထဲတွင် ကြိုးပေးအဆုံးစီရင်လိုက်သည်။ ဤသို့သော အချင်းအရာများအား နောင်လာနောက်သားများ အမြဲတမ်းအောင့်မေ့သတိရ မြတ်နိုးတတ်စေရန် ထိုခေါင်းဆောင်ကြီးများကျဆုံးသွားသော နေ့ ဇူလိုင် ၁၉ ရက် ကို နိုင်ငံတော်က တရားဝင် အစိုးရရုံးပိတ်ရက် အာဇာနည်နေ့ အဖြစ် ဂုဏ်ပြုမှတ်တမ်းတင်လိုက်ပါသည်။


အာဇာနည်များ


ဗိုလ်ချုပ်အောင်ဆန်း

ဒုတိယ ဥက္ကဌ ဘုရင်ခံအမှုဆောင် ကောင်စီ


ဦးဘချို

သတင်းနှင့်ပြန်ကြားရေး ဝန်ကြီးဌာန ဝန်ကြီး


မန်းဘခိုင်

စက်မှုလက်မှုနှင့် အလုပ်သမားဝန်ကြီးဌာန ဝန်ကြီး


ဦးဘဝင်း

ထောက်ပံ့ရေးနှင့် ကူးသန်းရောင်းဝယ်ရေး ဝန်ကြီးဌာန ဝန်ကြီး


သခင်မြ

ဘဏ္ဍာရေး နှင့် အခွန်တော် ဝန်ကြီးဌာန ဝန်ကြီး


ဦးရာဇတ်

ပညာရေးဝန်ကြီးနှင့် အမျိုးသားစီမံကိန်း ဝန်ကြီးဌာန ဝန်ကြီး


မိုင်းပွန်စော်ဘွားကြီး စဝ်စံထွန်း

တောင်တန်းဒေသရေးရာဝန်ကြီးဌာန ဝန်ကြီး


ဦးအုန်းမောင်

ဒုတိယ အတွင်းဝန် လမ်းပန်းပို့ဆောင်ရေး ဝန်ကြီးဌာန


ရဲဘော် ကိုထွေး

ဥးရာဇတ်၏ သက်တော်စောင့်

ဘဏ္ဍာရေးဝင်ကြီး ဦးတင်ထွဋ်၊ ပြည်ထဲရေးဝန်ကြီး ဦးကျော်ငြိမ်း တို့သည် အခင်းဖြစ်ပွားခဲ့စဉ်အချိန်က ထိုအစည်းအဝေးခန်းမထဲတွင် မရှိခဲ့ချေ။ ထို့အပြင် လုပ်ကြံသူများထဲမှ ဦးဘညွန့်သည် လွှတ်တေ်ာ၏ ဒုတိယပြောရေးဆိုခွင့်ရှိသူ ဝန်ကြီးဦးနု၏ အခန်းထဲသို့ ဝင်ရောက်သွားရှာဖွေခဲ့သေးသည်။ ဦးနုသည် ကံကောင်းစွာဖြင့် ထိုအခင်းဖြစ်သောနေ့က နေမကောင်း၍ အစည်းအဝေးကို တက်ရောက်နိုင်ခြင်းမရှိခဲ့ပါကြောင်း တရားရေးစစ်ဆေးသောအခါတွင် ပြန်လည်ပြောကြားချက်များ သိရှိရပါသည်။

General Aung San & His ministries

General Aung San & His ministries, working on constitution

ထိုလုပ်ကြံမှုထဲတွင် ဗြိတိသျှတို့သည်လည်း တစ်စိတ်တစ်ပိုင်းပါဝင်ပက်သက်မှုရှိမည်ဟု အများပြည်သူကယုံကြည့်ထားသည်။ အဘယ်ကြောင့်ဆိုသော် အခင်းဖြစ်ပွားစဉ်ထိုအချိန်က ဗြိတိသျှအရာရှိ နှစ်ဦးတို့သည် အခင်းဖြစ်ပွားစဉ်နေရာနှင့် မနီးမဝေးတွင် ရှိနေခဲ့ပြီး ထိုနှစ်ဦးအနက် တစ်ဦးသည် ဦးစောနှင့်သူ၏အဖွဲ့များအား လက်နက်ခဲယမ်းများ ပံပိုးပေးခဲ့ရာတွင် အဓိကပါဝင်သူ ဖြစ်ခဲ့သည်။ အခင်းဖြစ်ပွားပြီး ရဲများစုံစမ်းရှာဖွေသော် ဦးစော၏ အိမ်နံဘေးရှိ ရေကန်အနီးတစ်ဝိုက်တွင် လုပ်ကြံခဲ့စဉ်က အသုံးပြုခဲ့သော လက်နက်ခဲယမ်းများကို ပြန်လည်ရှာဖွေရရှိခဲ့သည်။
မြန်မာနိုင်ငံ၏ နောက်ဆုံး ဘုရင်ခံတာဝန်ကို ထမ်းဆောင်လေသော စစ်ဦးစီးဗိုလ်ချုပ်မှူး ဘုရင်ခံ ဆာလ်(စ်) ဟူးဘတ်လ်ရန့်စ် သည် နောင်တစ်ချိန်တွင် ဝန်ကြီးချုပ်ဖြစ်လာမည့် ဦးနုအား နိုင်ငံတော်ကို အုပ်ချုပ်ရန်တာဝန်လွှဲပြောင်းပေးအပ်ခဲ့ပြီးလျှင် ဇန်နဝါရီလ ၄ ရက် ၁၉၄၈ ခုနှစ်တွင် လွတ်လပ်သော မြန်မာနိုင်ငံတော်အဖြစ် တရားဝင်ကြေညာနိုင်ခဲ့လေသည်။

မှတ်သားဖွယ် အချက်များ

အထိန်းအမှတ်နေ့ - ဇူလိုင် ၁၉
အမည် - မြန်မာ့ အာဇာနည်နေ့
ကျဆုံးချိန်- နံနက် ၁၀ နာရီ ၃၇ မိနစ်
Fပထမဦးဆုံး ကျင်းပသော အာဇာနည် အခမ်းအနား - ၂၀ ဇူလိုင် ၁၉၄၇ ခုနှစ် (ရန်ကုန်)